'കരിയില'
ഇല
മരവുമായ്
പ്രണയത്തിലായിരുന്നു ...
മരം പക്ഷെ
ഇലയെ കൊഴിച്ചിരിക്കുന്നു !
അനേകായിരം
ഇലകൾക്കിടയിൽ
ഒരില !
മരത്തിനു തീർത്തും
അപ്രസക്തം തന്നെയാണ് !
മരത്തിനുവേണ്ടി
ആഹാരം വെച്ചത്
മഴയേൽക്കാതെ
മരത്തിന് കുടചൂടിയത്
വെയിലേൽക്കാതെ
മരത്തെ പൊതിഞ്ഞതങ്ങനെ
കരിയിലക്കുമുണ്ടായിരുന്നു
കണക്കുപറയാത്ത സ്നേഹം !
മരത്തിനുചുവട്ടിൽ
മണ്ണായിത്തീരുവാൻ,
മരം വലിച്ചെടുക്കുമ്പോൾ
മരത്തിലേക്ക് മടങ്ങിപ്പോകാൻ
കാറ്റുവന്നുവിളിച്ചിട്ടും
ചിറകില്ലാത്ത പ്രണയവുമായി
കരിയില കാത്തുകിടക്കുന്നുണ്ട്!
നിന്റെ കാലുകളതിനെ
ചുംബിക്കാതിരിക്കട്ടെ !
സനീഷ് കായണ്ണ ബസാർ
(കൊറോണക്കാലത്തെ കവിതകൾ -48 )
അഭിപ്രായങ്ങളൊന്നുമില്ല:
ഒരു അഭിപ്രായം പോസ്റ്റ് ചെയ്യൂ