Tuesday, April 10, 2018

ജ്യോതിഷം


രാഹുകാലവും
ചൊവ്വാദോഷവും
മുഹൂർത്തവും
കല്യാണദിനവും
ഗണിച്ചെടുക്കുന്ന
ജ്യോതിഷിമാർ
ഹർത്താൽദിനം കൂടി
അങ്ങ്പറയണം !
അതാണ്  അതിന്റെ ഒരിത് !
ഏത് ?!

Monday, March 26, 2018

ജട്ടി

'ജാതി'
ഇംഗ്ലീഷിലെഴുതിയപ്പോൾ
'ജട്ടി' എന്നുവായിച്ച
കുട്ടിയുണ്ടായിരുന്നു!

അവൻ
ശരിയായിരുന്നു!
ജാതി
ജട്ടിപോലെയാണ്.
ഇടാം
ഇടാതിരിക്കാം
കളയുകയുമാകാം.

...ആയതിനാൽ
ആതിരയുടെ*
പുടവ
ജാതിക്കോമരങ്ങൾ
കോണകമായി
ഉപയോഗിക്കട്ടെ!

അവർ
മദ്യത്തിന്റെ
ബോധക്കേടിലും
ബോധ്യത്തോടെ
ജാതി
സൂക്ഷിക്കുന്നുണ്ട്!

*ദളിതനെ വിവാഹം കഴിക്കുന്നതിനാൽ പിതാവ് കുത്തിക്കൊന്ന പെൺകുട്ടി 

Sunday, March 4, 2018


കാട്



മധുമാർ
ഇനി
നാടിറങ്ങണ്ട !

നാട്ടിൽ
നിയമവും
മനുഷ്യനുമാണ് !

കാട്ടിൽ
കരടിയും
കഴുകനും
നിന്നെ
സംരക്ഷിക്കുo
സ്നേഹിക്കു൦ !

വസന്തം
കാട്ടിൽ
മാത്രമത്രെ !


Friday, March 2, 2018

ഉള്ളി

ഉള്ളീ
ക്ഷമിക്കുക !

നീ
സമൂഹ
സമക്ഷത്തിങ്കൽ
അപമാനിക്കപ്പെട്ടിരിക്കുന്നു !

നിനക്കുവേണ്ടി
ഒരു മനുഷ്യനെ
കൂട്ടം ചേർന്ന്
തല്ലിക്കൊന്നിരിക്കുന്നു !

തൊലിയിൽപോലും
കണ്ണുനീരുള്ള
ഉള്ളീ
നീയെത്ര ശ്രേഷ്ഠം  !

വരണ്ട
കണ്ണുകൾ
ഈ ഭൂമിയെ
മരുഭൂമിയാക്കുന്നു!

ഉള്ളീ
നിന്റെ അപമാനത്തിന്
ഞാൻ
മാപ്പുചോദിക്കുന്നു !

Monday, February 26, 2018

എന്നെയവർ *


മധു. 
മധുരമറിയാത്ത  
കയ്പുമാത്രമറിഞ്ഞ 
ആദിവാസി !

അരിയും മല്ലിയും 
മോഷ്ടിച്ചതാണ് കുറ്റം !
അവനുവേണ്ടി 
ചിലവാക്കപ്പെട്ട കോടികൾ 
നിന്റെ വയറ്റിലായതുകൊണ്ടാണ് 
അവന്  വിശന്നത് ! 

ചിലപ്പോഴൊക്കെ 
വിശക്കുന്നവന്റെ 
ഒരേയൊരവകാശവും 
പ്രത്യയശാസ്ത്രവും 
മോഷണം മാത്രമാണ് !

അമ്മ ഉരുട്ടിത്തന്നത്
തീട്ടമായതുകൊണ്ടാണ്  
ഒരുപിടിച്ചോറിലെ
സ്നേഹവും സൗഖ്യവും
നീയറിയാതെ പോയത് !

അവന്റെ മണ്ണിലാണ് 
നീ മാളിക പണിതത് 
കൃഷിയിറക്കിയത് 
അവനെത്തന്നെ
അടിമയാക്കി 
പണിയെടുപ്പിച്ചത് !

മാറിമാറി വരുന്ന 
അധികാരത്തിന്റെ അപ്പം 
നക്കുന്നതുകൊണ്ടാണ് 
അന്ധയായ നീതിദേവത 
എന്നും നിന്റെ കൈകളിൽ !

കൊടിയും 
പുണ്ണ്യഗ്രന്ഥവും
തിരിച്ചെടുക്കുക !
നിന്റെ തന്തയും തള്ളയും 
ഉണ്ടാക്കിയതല്ലാത്ത 
അവന്റെ  'കാടും മണ്ണും' മാത്രം 
തിരിച്ചുനൽകുക !

സെൽഫിയെടുത്തശേഷം 
സൂക്ഷിച്ചുനോക്കിയോ ?
കാട്ടിലെ  അവനെക്കാളും 
നാട്ടിലെ നീ തന്നെയാണ് 
അപരിഷ്‌കൃതൻ 
ഗുഹാമനുഷ്യൻ!

എന്നിട്ടും ...



*  ശ്രീ മധുവിന്റെ മരണമൊഴി .

Friday, February 9, 2018

കൊലാലയം


കുടിവെള്ളം തേടി
വെള്ളക്കുപ്പി വാങ്ങാൻ
ശമ്പളമില്ലാത്ത  കുട്ടികൾ
പിച്ചക്കാരുടെ ശബ്ദത്തിൽ
സ്റ്റാഫ്റൂമിലെത്തി
ദൈന്യതയോടെ വിളിക്കുന്നു
'സാറേ'...!

മൂത്രമൊഴിക്കാൻ
സ്ഥലവും സൗകര്യവുമില്ലാതെ
പെൺകുട്ടികൾ
മൂത്രഗർഭം പേറി നടക്കുന്നു !

കക്കൂസ് ഖജനാവ്
നിറഞ്ഞുകവിഞ്ഞതിനാൽ
സെന്റർ സ്ക്വയറിൽ*
'കാര്യം' സാധിക്കുന്ന
ഹോസ്റ്റലിലെ കുട്ടികൾ!

പഠനദിവസങ്ങൾ
കിട്ടിയില്ലെങ്കിലും
ഊഹങ്ങളിൽനിന്നും
ചോദ്യപേപ്പർ
തയ്യാറാക്കേണ്ടി വരുന്ന
മജീഷ്യൻമാരായ
എന്റെ പ്രിയ സഹപ്രവർത്തകർ!

ആകാശത്തുനിന്നും
അപ്പപ്പോൾ വരുന്ന ജോലികൾ
"ഇതെന്റെ ഡ്യൂട്ടിയല്ല
ഇതുനിന്റെ ഡ്യൂട്ടിയാണ് "
എന്നും മറ്റുമൊക്കെ പറഞ്ഞും
പറയാതെ പറഞ്ഞും
ജോലികൾ ചാർത്തിക്കൊടുത്ത്
ശത്രുക്കളായിപ്പോയ
ആത്മമിത്രങ്ങളായ
അനദ്ധ്യാപകവിഭാഗം!

ഇത്
കലകളുടെ മൃതിയിടം.
മഹാ –അരാജകീയം!

തിരക്കായ തിരക്കിനിടയിൽ
ഇത്തിരി സമയം കിട്ടിയിരുന്നെങ്കിൽ
ഒന്നുപോയി കെട്ടിത്തൂങ്ങിയേനെ!

* a shopping mall, near to maharaja's college.





Saturday, September 8, 2012

ചതി



   നീ 
   പാവങ്ങളും 
   പട്ടിണിയുമുള്ള 
   എന്‍റെ  നാട്ടില്‍ 
   വിരുന്നുവന്നവനായിരുന്നു!

   ആഹാരവും 
   ആവാസവും തന്നപ്പോള്‍ 
   നീയെനിക്ക് ദൈവസമം!

   വിശുദ്ധ പുസ്തകങ്ങളെല്ലാം 
   ഒരേ സത്യം പറഞ്ഞിട്ടും 
   നീ നിന്‍റെ പുസ്തകമെടുത്ത്‌ 
   എന്‍റെ  കൈകളില്‍ വച്ചു!

   അനന്തരം 
   നിന്‍റെ ദൈവത്തിന്  
   ഞാന്‍ അടിമപ്പെട്ടു!

   മഹാഗ്രന്ഥം  
   എന്നെ മോചിതനാക്കട്ടെ.
   ദൈവം നിന്നെയും!